又一年要續會了 ~~~~

年頭第一次加入arashi 粉絲會 ... 以為點都有一絲希望抽中飛 ...
但好可惜 ... 失敗 了 ~ 我會再接再厲 ...
J FAN 排左一年隊都抽唔中入會 ~ 仲要成1,4xx ... 食水未勉太深 ~
然後同事介紹左一個叫阿葛 ... 收 7xx  ~ 平成半囉 ...
不過我覺得 ... ~ 我都只係 要佢個地址 ~ 其他都係自己攪 ... 一年最多收3~4份會報 ~
但又唔可以話人地收你咁貴 ... 因為你係求人做野~ 唔使錢咩 ~
所以呢個世上係無免費午餐的 ~ 但今次 ... 我決定要尋找免費午餐~
事緣係 會籍係14年1月到期 ~ 我問阿葛續會收幾多 ~
￥4,000 一年 ~ 依家對7x ... 我對10俾佢都係 400 姐 ..
但佢收我530 囉 ~ 即使我一年有10份會報 ~ 每份 都收我20 蚊郵費 ...
仲要係我自己去拎而唔係寄上門 ~ 唉 .. 我真係覺得好貴 ~
所以 ... 我只好求助日本的朋友 ~ 好感動 ... 佢肯幫我 ~
我真係覺得 ... 日本人好鐘意幫人 ~
我諗緊到底我要送返d咩俾佢感謝佢好 ~

宮燒肉居酒屋

這餐飯算是慶祝友人生日麻 ?

因為佢只係講自己想食咩 ~ 同另一友人都無講請佢食~

不過埋單都係請 ... haha ~ 應該算係慶祝掛 ~

生日友人以為係放題 ... 不過好可惜 ~ 佢誤會了 ...

經過商討 .. 決定散叫 ~ 雖然個2人餐望落好似咩都有 ~ 加埋都係500幾蚊 ~
但我覺得3個人食2人餐~好多野都分享不到 ~ 所以散叫比較好 ~

首先叫左一個燒牛拼盤 ~ 有西冷 ... 肋骨 ... 好似有4款 ~
西冷係最好食 ... 燒過火都好淋 ...

食牛 ... 其實我真係覺得 要生生地先好食 ~

凱撒沙律 ... 好大粒芝士 ~ D 菜不是太新鮮 ...

炸雞 ... 原來以為係一舊舊 ~ 不是雞搥 ~ 仲要無味架囉 ~
好乾 ... 無味 ~ 好細舊 ~ 唔好食 ...

呢個係泡菜石頭飯 ~ HA ... 因為撈完隻蛋先影相 ~ 要加返 ...
無咩特別 ~ 唔算難食 ... 可以接受 ~ 辣D 會開心D ...

這間燒肉居酒屋勝在選擇種類比較多 ~ 不過味道就一般 ...
可以唔使再試：P

三重縣 機票 + 酒店 確認 ~

早在9月19日晚上 ... 即係我去公司旅行當晚 ~
出發前同父母講 ...HK EXPRESS 機票好平 ...新年去囉 ~
之後上網睇 ... 平均HKD 3,xxx 一個人 ~
媽媽一句話 ... 咁買啦 ~ 就買了 ...
果晚我仲覺得自己發緊夢 ... 因為當晚就出發去日本 ~
又即刻確認下個旅行係幾時 ... 好可怕 !!!
其實我人工不高 ... 但沒有儲蓄的習慣 ~ 都用晒黎旅行 lu ...

2014 年 2月4日 出發
HKG 0930  ---- UO686 ---- KIX 1355

2014 年2月9日 回港
KIX 1450 ---- UO687 ---- HKG 1815

6天之旅 ... 好緊張 !!
對於EXPRESS 黎講 ... 去大阪時間比東京好 ~ 至少係正常時間 ...
東京去到係夜晚1230 ... 要訓機場 ~ 走又係凌晨機走 ... 都唔知第朝落機返唔返工好 ~

由於 係新年關係 ... 廉航價錢都比平時o既貴 ... 但都合理 ~
因為係廉航 ~ 飛機餐 ... 無 ~ 寄行李 ... 另外俾錢 ~
我地揀左每人寄15kgs 行李 ... 揀完我覺得好白痴 ~!
HKD 80 寄15 kgs ... + 多HKD 20 就可以寄20kgs ... 點解我唔俾多20蚊 ???
我好後悔 ... 後來更得知櫻井翔3月 會有電影上 ~
呀 ... 2月一定好多電影雜誌 !!! 好差呢件事 !!! 算吧 ...

最後加加埋埋 機票 + 稅 + 寄行李費 15kgs = HKD 3,647 一人 ~

係新年黎講 ... 呢個價錢都算平 ? 不過我地去果幾日其實都唔係紅日 ...

然後我就諗 ... 到底 落關西去邊好 ~
初先有諗過去鳥取 ... 但係因為冬天 ~ 砂丘好似會落雪 ~ 不太好 ...
我明明睇 沙漠 ... 見到個沙漠落雪 ~ 好奇怪 ...
有諗過去廣島 ... 不過我自己去過 ~ 又唔想再去多次 (自私) ~

最後決定去三重縣 ~ 未去過 ... 加上都好似有唔少野睇 ~
冬天行程不能太緊密 ~ 快天黑 又凍 ... 唔可以太趕行程 ~

然後到book 酒店 ... 因為係我book 完機票之後一星期再幫我呀e book ...
已經 變左 HKD 3,700 了 ~ 貴左小小 ... 到今日再CHECK ... 已經 HKD 6,xxx ~

express 亦好奇怪 ... 隔左好耐先send 一份Itinerary 俾我 ~ 仲要得我呀e 個booking ...
佢份野仲要寫回程日早左一日 ~ 嚇死我 ...
之後我send email 去問 佢先話 攪錯左 ~ 又話會send返份岩o既俾我 ~
但係我到依家都無收到 =.=

今次一共有5個人 ... 所以 要book 一間3人房 ~
要符合我搵酒店原則 ... 平 ~ 近車站 ~ 有小小難度 ... 因為有加床3人房比較少 ~

最後 ...
3晚 ... 松阪 + 1晚 ... 湯の山温泉 + 1晚 ... 難波

松阪シティホテル (連早餐) (酒店網book)
2人房 : ￥3,000   3人房 : ￥4,500

ホテル湯の本 (1汨2食 ) (jalan book 用point 2,500)
伊勢松阪膳プラン☆伊勢エビと柔らか和牛の人気料理
5人一室 : ￥15,225 + 入湯稅 ￥150

フローラルイン難波 (酒店網book)
2人房 : ￥4,800  3人房 : ￥5,600

酒店 同機票 都book 好了 ~ 行程其實都大約確定 ...

酒店 每人約 : ￥30,555 + 機票 HKD 3,647 =  HKD 約 6,100 ~